धरानमा सुरु भयो छठ, नदी किनारमा देखियो रौनक (फोटो फिचर)

सूर्यको अनुष्ठान गरी नेपालको तराई क्षेत्रमा निकै धूमधामका साथ मनाइने छठ पर्वको रौनक भित्री मधेस, चुरे क्षेत्रमा पनि विस्तार हुँदै गइरहेको छ । 

नेपालको तराई क्षेत्रमा निकै धूमधामका साथ मनाइने छठ पर्व धरानका खोला तथा नदी किनारमा सुरु भएको छ । धरानका नदी किनारलाई सौन्दर्यीकरण गर्दै, स्नान घाट निर्माणको तयारी थालिएको छ । 

हिन्दु धर्मावलम्बीका महन्वपूर्ण चाड दसैँ र तिहार सम्पन्न भइसकेपछि अब छठको रौनक देखिन थालेको छ । 

वैदिक सनातन धर्ममा सूर्यलाई देवता मानिन्छ । सूर्यको वरपर पृथ्वी घुम्ने र शक्ति र ऊर्जाको केन्द्र सूर्यसँग मानवको अस्तित्व परिभाषित भएको हुन्छ । मानवको सहअस्तित्व त्यसैले पनि छठ पर्वसँग सांस्कृतिक रूपमा जोडिएको छ ।

सद्भाव र भातृत्वको प्रतीकसमेत मानिने यस पर्वलाई बढो हर्ष अनि उल्लासका साथ नदी, ताल तलैया या पोखरीको किनारलाई सजाएर तयार पारिएका घाट, केराका थम्बा, झिलिमिली बत्ती राखिने गरिएको छ । अस्ताउँदो र उदाउँदो दुवै सूर्यको किरणलाई अर्घ दिएर यो चाड मनाइने गरिन्छ ।

यसको पहिलो दिनलाई अरबा अथवा नहाई खाय भनिन्छ । त्यस्तै, दोस्रो दिनलाई खर्ना, तेस्रो दिनलाई सँझिया अर्घ्य अर्थात् छठ भनिन्छ । कार्तिक शुक्ल चतुर्थीबाट सुरु भएको यो पर्वको तेस्रो दिन छठ अर्थात् षष्ठी हो । यसको अन्तिम दिन अर्थात् चौथो दिनलाई विहनिया अर्घ्य पारण भनिन्छ ।

यो पर्वका यी चार दिन विभिन्न कामहरू गरिन्छ । अरबाको दिन गाउँका युवाहरू मिलेर छठ मनाइने नदी या ताल वा पोखरीको किनारलाई सजाउने, सडकहरू सफा गर्ने गर्छन् ।

यसको तेस्रो दिन अर्थात् सँझिया घाटको दिन साँझमा व्रतालुहरू त्यसरी सजाइएका खोला, नदी, तलाउ अथवा जलाशयको पानीमा आधा डुबेर अस्ताउन लागेको सूर्यलाई दूधको अर्घ्य दिने गर्छन् । अनि चौथो दिनको बिहान सूर्य उदाउनुअघि नै छठ घाटमा पुगेर उदाउँदै गरेको सूर्यलाई अर्घ्य दिएर व्रतको समापन गर्ने चलन छ ।

छठको दिन विभिन्न समूह बनाएर सामूहिक रूपमा भजन गाउने र रमाइलो गर्ने चलन पनि रहेको छ । पर्वमा मैथिली भाषाका पारम्परिक गीतसंगीतलाई महत्व दिइन्छ ।

छठको धार्मिक महत्वसँगै सांस्कृतिक पाटो समेत विस्तार हुँदै गइरहेको छ । छठ पर्व जातजाति, भूगोल, वर्गभन्दा माथि उठेर प्रकृतिको पूजाका रुपमा लिइन थालिएको छ । सूर्य, जलचर, थलचरलगायतका प्राणीको समेत मंगल कामना गरेर छठ मनाइँदै आएको छ ।