_1696921596.gif)
सुनसरी/ देशकै प्रमुख पर्यटकीय क्षेत्रका रुपमा ख्याती कमाएको पर्यटकीय नगरी भेडेटारसँगै रहेको साँगुरीगढी ओझेलमा परेको छ । प्रचार हुन नसक्दा यो स्थान ओझेलमा पर्दै गएको हो ।
किरात शासनकालमा यो गढीलाई नेपाल–भारत र भारत–चीन व्यापारको निगरानी गर्नेको रुपमा लिइएको थियो ।
किरात राज्य हुँदा होस् या धनकुटा गौँडा, साँगुरीगढी पञ्चायतकालको आधा समय पनि महत्वपूर्ण ठाउँको रुपमा रह्यो ।
सङ्घीयतापछि यही गढीको नामबाट यो क्षेत्रकोे नामसहित साँगुरीगढी गाउँपालिका निर्माण भएको छ ।
टुक्रामा रहेको राज्यहरुलाई एकीकरण गर्ने क्रममा पृथ्वीनारायण शाहले लिम्बूवान क्षेत्रमा रहेको यो गढीलाई वि.सं.१८३१ साउनमा एकीकृत गराएको थियो । त्यसपछि २०३६ सालसम्म यो पूर्वी पहाडको प्रवेशद्वारको रुपमा रह्यो ।
त्यसपछि धरान धनकुटा सडक बनेपछि यो स्थान सुनसान बन्यो ।
यो महत्वपूर्ण स्थानको प्रचारप्रसार गर्नसके प्रशस्त पर्यटकीय सम्भावना बोकेको साँगुरीगढी गाँउपालिकाका अध्यक्ष जितेन्द्र राई बताउँछन् ।
यो गढी पर्यटकीय नगरी भेडेटारबाट ३ किलोमिटर उत्तर पश्चिममा छ ।
भेडेटारमा दैनिक सयौंको सङ्ख्यामा पर्यटक पुग्ने गरेका छन् । तर यो गढीमा भने आक्कलझुक्कल केही पर्यटक पुग्ने गरेका छन् ।
त्यसो त पर्यटक भित्र्याउन पर्यटन विकास कार्यालय काँकडभिट्टा तथा तत्कालीन जिल्ला विकास समितिले लाखौँ रुपियाँ खर्चेर पूर्वाधार त निर्माण गरेका छन् ।
यहाँसम्म पुग्ने सिढी, प्रवेशद्वार, ट्वाइलेट रेलिङ्गलगायतका संरचना निर्माण भएका छन् ।
पूर्वाधार निर्माण भए पनि प्रचारप्रसारको अभावका कारण पर्यटकको पहुँच पुग्नै नसकेको भेडेटारका होटल व्यवसायी रमेश श्रेष्ठ बताउँछन् ।
धरानदेखि यो गढी हुँदै एकीकृत पदमार्ग घोषणा गरिए पनि थप पूर्वाधार विकास गर्न सकेको छैनन ।
प्रदेश सरकारले साँगुरीगढी गाउँपालिकालाई पर्यटकीय क्षेत्र घोषणा गरेको भए ऐतिहासिक गढीको संरक्षण, संवर्धन र प्रचारमा ध्यान नगएको बताइएको खवर गाेरखापत्र अनलाइनमा प्रकाशित छ ।
