धार्मिक पर्यटकीय स्थल बराहक्षेत्र वर्षामा बर्सेनि पहिरोको सास्ती खेप्दै आइरहेको छ ।

यो सिजन मात्रै दर्जनौं पटक पहिरो गइसकेको छ, जसलाई वडा कार्यालय, नगरपालिका र सडक डिभिजन कार्यालयको डोजर र स्काभेटर प्रयोग गरी हटाउने काम भएको छ ।
सोमबार चतरा- बराहक्षेत्र सडकको दर्जनौं स्थानमा एकै पटक पहिरो जाँदा यात्रुहरु अलपत्र परेका छन् ।
बराहक्षेत्र सडक खण्डका न्युइन्टेक, चतराघाट, कोशीपुल, धनसार खोला, मोती डाँडा, कृष्णभीर, झरझरे, १७ नम्बर लगायतका स्थानमा एकै पटक पहिरो झरेको छ ।

पहिरोका कारण सडक अवरुद्ध हुँदा यात्रु र यातायातका साधन बाटामै अलपत्र परेको स्थानीय अटो चालक भीमराज राईले बताए ।

विश्वका हिन्दु धर्मावलम्बिहरुको पवित्र तीर्थ स्थल बराहक्षेत्रसम्म पुग्ने सडक सहज नहुदा तीर्थ यात्रीले सास्ती बेहोर्नु परिरहेको छ ।
यात्रुको सहज आवागमनका लागि सडक डिभिजन कार्यालय इटहरीको सहयोगमा अवरुद्ध सडक खुलाउने कार्य भइरहेको बराहक्षेत्र नगरपालिकाका प्रमुख रमेश कार्कीले बताए ।
तत्कालको समस्या समाधान गर्नमात्रै नगरले सक्ने नगर प्रमुख कार्की बताउँछन् । चतरा- बराहक्षेत्र सडकको पहिरोको समस्या दीर्घकालीन निराकरणका लागि सङ्घीय सरकारलाई पहल गरिदिन उनले अनुरोध गरे ।

बराहक्षेत्रमा नेपालका विभिन्न जिल्लासँगै भारतको बिहार, उत्तराखण्ड, सिक्किम दार्जिलिङ सहित भुटानबाट समेत भक्तजनहरु आउने गरेका छन् ।

बर्सेनि वर्षामा अवरुद्द हुने चतरा बराहक्षेत्र सडकको दीगो निर्माणमा सरोकारवालाको ध्यान जान सकेको छैन । वर्षमा आधा दर्जन बढी धार्मिक मेला लाग्ने बराहक्षेत्रमा ६ लाख बढी धार्मिक पर्यटकहरु आउने गरेका छन् ।

देशका महत्वपूर्ण धार्मिक पर्यटकीय स्थलसम्म पुग्ने सहज पहुँच निर्माण हुन नसक्दा सरकारको पर्यटन विकासको लक्ष्य नारामा मात्र सिमित हुँदै आएको छ ।