_1696921596.gif)
धरान / धरान उपमहानगरपालिका मेयर हर्क साम्पाङ र वडा अध्यक्षहरू बिचको विवादले धरानको विकास, निर्माण र उद्योग, व्यवसायमा पनि असर पर्ने भएकोमा सुनसरी उद्योग वाणिज्य सङ्घले गम्भीर ध्यानाकर्षण भएको जनाएको छ ।
संघका अध्यक्ष विजय श्रेष्ठले मंगलबार एक विज्ञप्ती जारी गर्दै नगरको विकासका लागि बजेट बनाउनुपर्ने महत्वपुर्ण समयमा बैठक बस्न नसकेकोमा उद्योगी, व्यवसायीहरुको छाता संगठन दुःखी भएको पनि जनाएका छन्।
धरानको विकासको लागि चुनिएका जनप्रतिनिधिहरु दुई ध्रुवमा विभाजित भएर एक आपसमा आरोप, प्रत्यारोप गरिरहदा जनप्रतिनिधिहरुलाई मात्र नभै समग्र उद्योगी, व्यवसायीहरु, धराने जनता र नगरको विकासमा पनि थप गम्भीर असर पर्ने विज्ञप्तीमा उल्लेख छ
अहिलेको परिस्थितिमा उद्योग÷व्यवसायीहरूलाई उद्योग, व्यवसाय सुचारु रूपले सञ्चालनका लागि संरक्षण र संवर्द्धन गर्नुपर्ने आवश्यकता रहेको अवस्थामा स्थानिय सरकारको रूपमा रहेको धरान उपमहानगरपालिका भित्रको आन्तरिक खिचातानीको घट्नाप्रति वक्तव्यमा चिन्ता प्रकट गरिएको छ ।
सङ्घका अध्यक्ष श्रेष्ठको हस्ताक्षर वक्तव्यमा दुवै पक्षले लचकता देखाई वार्ता र संवादको माध्यमबाट समस्या समाधानमा लाग्न सुझाव दिँदै एक आपसको दम्भ त्यागी विधि, प्रक्रिया बमोजिम अघि बढ्न अनुरोध गरिएको छ ।
